ସାନ୍ତା ପୋଷାକରେ ହନୁମାନଜୀ; ହିନ୍ଦୁ ସଂଗଠନଙ୍କ କଡ଼ା ବିରୋଧ

ବୋଟାଦ, ୩୧/୧୨  : ନିକଟରେ ରାଜସ୍ଥାନ, ମଧ୍ୟପ୍ରଦେଶ ଓ ଛତିଶଗଡ଼ ବିଧାନସଭା ନିର୍ବାଚନ ସମୟରେ ବିଭିନ୍ନ ରାଜନୈତିକ ଦଳର ନେତାମାନେ ବହୁ ବିବାଦୀୟ ବୟାନ ଦେଇଥିଲେ  । ଏପରିକି ସେମାନେ ଦେବାଦେବୀଙ୍କୁ ମଧ୍ୟ କଟାକ୍ଷ କରିବାକୁ ପଛାଇ ନଥିଲେ  । ବିଶେଷ କରି ହିନ୍ଦୁମାନଙ୍କ ଅନ୍ୟତମ ଆରାଧ୍ୟ ଦେବତା ପ୍ରଭୁ ଶ୍ରୀରାମଙ୍କ ପରମ ଭକ୍ତ ‘ହନୁମାନଜୀ’ଙ୍କ ଜାତିକୁ ନେଇ ଅନେକ ବିବାଦୀୟ ବୟାନବାଜି ହୋଇଥିଲା  । କେହି ହନୁମାନଜୀଙ୍କୁ ଦଳିତ କହିଥିଲେ ତ ଆଉ କିଏ ମୁସଲମାନ ତ ଆଉ କେତେକ ତାଙ୍କୁ ଖେଳାଳୀ ବୋଲି କହିଥିଲେ  । ତେବେ ନବବର୍ଷ ପୂର୍ବରୁ ଗୁଜରାଟରେ ହନୁମାନଜୀଙ୍କୁ ସାନ୍ତା ପୋଷାକ ପିନ୍ଧା ଯିବାକୁ ନେଇ ନୂତନ ବିବାଦ ଦେଖାଦେଇଛି  । ପ୍ରାପ୍ତ ସୂଚନାନୁଯାୟୀ, ଗୁଜରାଟରେ ସ୍ଥିତ ବୋଟାଦରେ ଥିବା ପ୍ରସିଦ୍ଧ ସାରଙ୍ଗପୁର ହନୁମାନ ମନ୍ଦିରେ ସ୍ଥାପିତ ହନୁମାନଜୀଙ୍କ ବିଗ୍ରହକୁ ଖ୍ରୀଷ୍ଟଧର୍ମାବଲମ୍ବୀମାନେ ମାନୁଥିବା ସାନ୍ତା କ୍ଲଜ୍ଙ୍କ ପୋଷାକ ପିନ୍ଧାଯାଇଥିଲା  । ପରେ ଏହାର ଫଟୋ ସୋସିଆଲ୍ ମିଡିଆରେ ଛଡ଼ାଯାଇଥିଲା  । ଏହା ଭାଇରାଲ୍ ହେବାରୁ ବିଭିନ୍ନ ହିନ୍ଦୁ ସଂଗଠନଗୁଡ଼ିକ ଏହାକୁ ନେଇ କଡ଼ା ବିରୋଧ କରିଥିଲେ  । ପ୍ରକାଶଥାଉ କି, ଏଠାରେ ଦିନକୁ ଦୁଇ ଥର ହନୁମାନଜୀଙ୍କ ବସ୍ତ୍ରକୁ ବଦଳାଇବାର ବହୁ ପୂରାତନ ପରମ୍ପରା ରହିଛି  । କିନ୍ତୁ ରବିବାର ଦିନ ହନୁମାନଜୀଙ୍କୁ ସାନ୍ତା ପୋଷାକ ପିନ୍ଧାଯିବାରୁ ବିବାଦ ଉପୁଜିଥିଲା  । ହିନ୍ଦୁ ସଂଗଠନମାନେ ଏହାକୁ ବିରୋଧ କରି ହନୁମାନଜୀଙ୍କ ଏହି ପୋଷାକକୁ ତୁରନ୍ତ ବଦଳାଇବାକୁ ଦାବି କରିଥିଲେ  ।