ବାତ୍ୟା ଅଂଚଳରେ ଆରଏସ୍ଏସ୍ ତରଫରୁ ରନ୍ଧାଖାଦ୍ୟ ବିତରଣ

ଭୁବନେଶ୍ୱର/ପୁରୀ,୭/୫ :  ସାମୁଦ୍ରିକ ଝଡ ଫଣି ଦ୍ୱାରା କ୍ଷତିଗ୍ରସ୍ତ ହୋଇଥିବା ପୁରୀ ଓ ଦାଣ୍ଡମୁକୁନ୍ଦପୁରରେ ଆରଏସ୍ଏସ୍ ତରଫରୁ ତିନିଦିନ ଧରି ରନ୍ଧାଖାଦ୍ୟ ବିତରଣ ହେଉଅଛି ।  ପୁରୀର ଘୋଡାବଜାର ସରସ୍ୱତୀ ଶିଶୁ ବିଦ୍ୟା ମନ୍ଦିରରେ ୫ ତାରିଖ ଦିନ ରନ୍ଧାଖାଦ୍ୟ ବିତରଣ ଆରମ୍ଭ ହୋଇଥିଲା । ପୁରୀରେ ୫ ତାରିଖ ଦିନ ୧୦୦୦, ୬ ତାରିଖ ଦିନ ୧,୨୦୦ ଓ ୭ ତାରିଖ ଦିନ ୧,୫୦୦ ଉର୍ଦ୍ଧ୍ୱ ବ୍ୟକ୍ତିଙ୍କୁ ରନ୍ଧାଖାଦ୍ୟ ବିତରଣ କରାଯାଇଛି । ସେହିପରି ଦାଣ୍ଡମୁକୁନ୍ଦପୁରରେ  ମଧ୍ୟ ଆରଏସ୍ଏସ୍ ତରଫରୁ ୬ ତାରିଖ ଦିନ ୫୦୦ ଲୋକଙ୍କୁ ରନ୍ଧାଖାଦ୍ୟ ବିତରଣ କରାଯାଇଥିବା ବେଳେ  ଆଜି ମଧ୍ୟ ୭୦୦ରୁ ଉଦ୍ଧ୍ୱର୍ ଲୋକଙ୍କୁ ରନ୍ଧା ଖାଦ୍ୟ ବିତରଣ କରାଯାଇଛି । ପୁରୀରେ ରାଷ୍ଟ୍ରୀୟ ସ୍ୱୟଂସେବକ ସଂଘର ସହସରକାର୍ଯ୍ୟବାହ ଶ୍ରୀ ଭି.ଭାଗେୟା ଜୀ ଉପସ୍ଥିତ ରହି ରନ୍ଧାଖାଦ୍ୟ ବିତରଣ କାର୍ଯ୍ୟକ୍ରମରେ ସାମିଲ ହୋଇଥିଲେ ।

ଏହି ବାତ୍ୟାର କ୍ଷତିଗ୍ରସ୍ତ ଅଂଚଳରେ  ରାଷ୍ଟ୍ରୀୟ ସେବାଭାରତୀ, ରାଷ୍ଟ୍ରୀୟ ସ୍ୱୟଂସେବକ ସଂଘ ଓ ଉକ୍ରଳ ବିପନ୍ନ ସହାୟତା ସମିତିର ସହଯୋଗରେ ବିଭିନ୍ନ ଅଂଚଳର ରାସ୍ତାଘାଟରେ ପଡି ରହିଥିବା  ଗଛ ଗୁଡିକ କଟାଯିବା ସହ ବିଭିନ୍ନ ପ୍ରକାର ସେବାକାର୍ଯ୍ୟ କରାଯାଉଛି ।
ଉକ୍ରଳ ବିପନ୍ନ ସହାୟତା ସମିତି ତରଫରୁ ୩ ତାରିଖ ଦିନ ବାତ୍ୟା ସମୟରେ ସମିତି ପରିସରରେ  ନିକଟବର୍ତୀ ବସ୍ତି ଅଂଚଳର ରହୁଥିବା ପ୍ରାୟ ୪୦୦ ଉଦ୍ଧ୍ୱର୍ ବାସିନ୍ଦାମାନଙ୍କୁ ରହିବା ସହ ରନ୍ଧା ଖାଦ୍ୟ ଯୋଗାଇ ଦିଆଯାଇଥିଲା । ଏତଦ୍  ବ୍ୟତୀତ ପ୍ରାୟ ୧୦ କୁଇଂଟାଲ ଚୁଡା,ଗୁଡ, ମହମବତୀ, ଦିଆସିଲି, ଲକ୍ଷାଧିକ ବୋତଲ ପାଣି ଓ ତାରପୋଲିନ୍ କିଛି ଅଂଚଳରେ ଯୋଗାଇ ଦିଆଯାଇଛି ।  ଯେହେତୁ ପ୍ରଦେଶର ତଟବର୍ତି ଜିଲ୍ଲାମାନଙ୍କରେ ବିପୁଳ କ୍ଷୟ କ୍ଷତି ହୋଇ ଅଛି ସେଥିପାଇଁ ପୁରୀ, ଖୋର୍ଦ୍ଧା ଓ କଟକ ଜିଲ୍ଲାରେ ୭ ଗୋଟି ସହାୟତା କେନ୍ଦ୍ର ସମିତି ତରଫରୁ ଖୋଲା ଯାଇଅଛି ।
ପୁରୀର ଘୋଡାବଜାର ସରସ୍ୱତୀ ଶିଶୁବିଦ୍ୟା ମନ୍ଦିର, ସରସ୍ୱତୀ ଶିଶୁବିଦ୍ୟା ମନ୍ଦିର ବ୍ରହ୍ମଗିରି, ଦାଣ୍ଡମୁକୁନ୍ଦପରୁ, ଚାନ୍ଦପୁର, ନିମାପଡା, ଭୁବନେଶ୍ୱରର ୟୁନିଟ-୩ ସରସ୍ୱତୀ ଶିଶୁ ବିଦ୍ୟା ମନ୍ଦିର, କଟକର ମହାନଦୀ ବିହାର ସରସ୍ୱତୀ ଶିଶୁବିଦ୍ୟା ମନ୍ଦିର ଠାରେ ସହାୟତା କେନ୍ଦ୍ର ସ୍ୱୟଂସେବକମାନଙ୍କ ଦ୍ୱାରା କାର୍ଯ୍ୟ କରୁଅଛି । ମୁଖ୍ୟ କେନ୍ଦ୍ର ଉକ୍ରଳ ବିପନ୍ନ ସହାୟତା ସମିତିକୁ ବିଭିନ୍ନ ଅଂଚଳରୁ ଆସୁଥିବା ସାହାର୍ଯ୍ୟ ଗୁଡିକ ଉପରୋକ୍ତ କେନ୍ଦ୍ରମାନଙ୍କରେ ପହଂଚାଇ ଦେବା ପାଇଁ ବ୍ୟବସ୍ଥା କରାଯାଇଛି । କଟକ, ଜଗତସିଂହପୁର ଜିଲ୍ଲାରେ ଅଧିକ କେନ୍ଦ୍ର ଖୋଲା ଯିବା ପାଇଁ ବ୍ୟବସ୍ଥା କରାଯାଉଛି ।
                                                         ଗୋଲଖ ଚନ୍ଦ୍ର ଦାସ